NKorea hotuin Guam beih tur chungchang nghah rih tum

North Korea ram hotu lu ber, Kim Jong-un chuan a sipaite hnen aṭangin US terrority, Guam thliarkar missile hmang kah dan tur report a dawng tawh a, mahse Kim chuan Guam beih tur chung­changah thutawp a siam hmain US chet dan nghah phawt a tum.

Kim Jong-un chuan che chhuak tura a tih hun a pianga che nghal tura inring turin sipaite chu a hrilh nghal bawk a ni.

NKorea hian kar hmasa khan Pacific-a US ram, Guam thliarkar bul tuipui chu missile pali hmanga kah dan tur a peihfel dawn niin a sawi a, an ruahmanna siamte chu Kim hnenah report-in, Kim thupek chauh hi an nghak tawh a ni.

Kim hian Thawhṭanni khan sipaite hi endikin, missile hmanga Guam kah dan tur rua­hmanna an siamte pawh uluk takin a enpui a, army officer-te pawh a sawipui bawk niin, state media KCNA agency chuan a tarlang. KCNA chuan Kim hian Korean peninsula-a US chet dan a thlir dawn a, US chet lak dan a zirin thu­tlukna hi a siam dawn a ni, a ti. Kim chuan an inkar boruak chhe tak tihdaih a nih theih nan US chuan duhthlanna dik tak a siam a ngai a ni, a ti.

Hetih lai hian US Defence Secretary Jim Mattis chuan NKorea hian Guam beih nan missile kapchhuak pawh ni se, US sipaite chu missile kapthla tur hian an inpeih tih a sawi. US sipaite chuan NKorea missile kahchhuah hi an hre nghal thei dawn a, US territory hi a fuh tawh dawn nia a lan chuan an lo kapthla mai dawn a ni, a ti.