Jordan-Syria ramri-ah mi 50,000 tangkhang

Syria hmarlam, Jordan nen a inri-naah raltlan 50,000 vel an tangkhang mek a, an dinhmun hi a him lo hle niin United Nations chuan a sawi.

UN thupuangtu, Farhan Haq chuan raltlante tangkhang mekna chu tunhnaia bomb thlakna hmunte a nih avangin a him tawk lo niin a sawi. An zingah hian hmeichhia leh naupang eng emaw zat an tel niin a sawi bawk. Haq chuan raltlan tangkhang zinga ṭhenkhat chuan an awmna hmun chu chhuahsan an tum a, mahse hei pawh hi an tam a him tawk lo a ni, a ti.

Raltlante awmna hmun hi berm tia hriat a ni a, ei leh in lam an tlakchham bakah, healthcare pawh a ṭha lo hle. Bial pakhat, Hadalat-ah chuan mi 4,000 vel chu chhangphut leh tui chauh ringin an awm mek a ni, a ti.

Kar kalta Ningani khan Syria sipaite chuan Jordan ramriah hian helho an man a,Helai ramri hi helho hian Jordan aṭanga tualchhung indona thlen mekna, Syria rama ralthuam tawlhluhna atana an hmang nasa nia sawi a ni. Islamic State (IS) firfiakten Jordan border guard pasarih an thah avangin kum 2016 June thla aṭang khan Jordan chuan Syria ramri hi alo khar tawh a ni. Ramri khar a nih avang hian Syria aṭanga Jordan rama luh tum raltlan tam tak an tangkhang ta a ni.