UK Prime Minister thar tur Liz Truss

Britian prime minister Boris Johnson thlaktu tur, Conservative Party hruaitu thlannaah foreign secretary, Liz Truss thlan tlin niin, Britain Prime Minister thar a ni dawn ta a ni.

Party hruaitu thlanna result hi Parliament-a Conservative party backbencher zawng zawng awm na, 1922 committee chairman Sir Graham Brady chuan nimin tlai khan a puang a ni.

Boris Johnson hian July thla khan PM a nihna aṭangin banna a thehlut a, mahse, amah thlaktu thlan a nih hma chu a hna hi chelh chhunzawm tura ngen a ni. Banna a thehluh lai hi an party-in Parliament-a majority a neih lai a nih avangin, Conservative hian party hruaitu thar thlan chhuah hmangin PM thar tur hi an thlang nghal thei a ni.

Party hruaitu thlanna hi vote thlak round nga neih a ni. A tirah chuan candidate hi 11 awmin, vote thlak chhoh zel hnuah vote hmu sang pahnihte thlan chhuah an ni. Hemi hnu hian party member-te chuan candidate pahnih aṭang hian hruaitu tur hi an thlang chhuak leh a ni. August thla tir lam aṭang khan vote hi mail leh online hmangin thlak a ni a, party member, annual subscription fee pe ten vote hi an thlak a, Zirtawpni tlai dar 5 khan vote thlak hun hi khar a ni.

Vote thlak round nga neih hnuah candidate zingah kum 47 mi Liz Truzz leh, kum 42 mi Rishi Sunak-te chu vote hmu sang pahnih niin, an pahnih aṭang hian party hruaitu tur hi thlan a ni ta a ni. Campaign ṭan hma chuan Rishi Sunak hi tling tura rin kai zawk a ni a, mahse campaign ṭan tak tak hnuah erawh Truss hian hma a hruai chho ta zel zawk thung. Result tihchhuahah Truss hian vote 20,000 chuangin Sunak hi a hneh a ni.