West Bank-a inkahnaah Israel sipai 6 an hliam

Israel-in Palestinian ram a luah, West Bank-ah Pathianni khan silai kengten Israel sipaite chuanna bus an kap a, bus driver leh Israel sipai paruk an kap hliam.

Israel thuneite chuan he pawikhawihna hi Jenin leh Nablus khaw inkara thleng niin, heng khaw pahnihah hian hun eng emaw chen chu Israel sipaite beihna a thleng fo niin an sawi. Pawikhawihtu nia rinhlelh, mi pahnih chu man an ni tawh bawk.

He thil thleng mita hmutute sawi danin, Palestinian-te chuanna car hian bus hi tlanpelin, bus a din hnuah silaiin an kap ta chiam niin an sawi a, hal an tum tih an sawi bawk. Israel TV lamah footage tihchhuahah, car chhungah hian bomb puakin a kang zui niin a lang.

Palestinian pawl zingah he thil thleng hi an tih a ni tih chhal an la awm lo.

Israel defence minister Benny Gantz chuan Israel sipaite chuan pawikhawihna thlentu leh he thila inhnamhnawihte zawn hna ngawrh takin an thawk nghal tih a sawi.

Hetih lai hian Gaza Strip lama roreltu, Palestinian pawl Hamas chuan Israel sipaite beih an ni chu fakin, hei hi Israel-in West Bank awpbeh a tumna tihtawp tuma hmalakna a ni, a ti.

Israel hian East Jerusalem huamin West Bank hi a luah sak a, Juda mi nuai nga vel awmin, tun hnaiah pawh Juda chenna tur in 200 chuang a sak belh leh a ni.

Hetih lai hian international law hnuaiah Israel-in Palestinian ram a luah hi dan kalh nia ngaih a ni thung a ni.