Canada-ah mi 10 vit hlum, Mi 15 in hliam an tuar

Canada rama Saskat­chewan province-ah Pathianni zing khan pawi­khawihna rapthlak tak thlengin, mi 10 vihhlum an ni a, mi dang 15 an hliam bawk. Pawikhawihtute hi chu man an la ni lo a, ngawrh taka zawn mek an ni.

Police-te chuan pawi­khawihtute hi mi pahnih - Damien Sanderson (31) leh Myles Sanderson (30) nia sawiin, an thlalakte pawh an tichhuak tawh a ni. He pawikhawihna thleng hi ruihhlo kaihhnawih thil nia a lan thu tualchhung hruaitute chuan an sawi.

Pawikhawihna hi James Smith Cree Nation leh a bul, Weldon-a hmun 13-a thleng a ni a, Canada rama ṭum khata a ruala mi beihna thleng rapthlak ber nia sawi a ni. Mi 2,000 vel chenna, James Smith Cree Nation leh mi 200 chauh chenna thingtlang khua, Weldon-ah hian state of emergency puan nghal a ni bawk. Heng khaw pahniha chengte chu fimkhur thilah pawn chhuak tam lo tura chah nghal an ni.

PM Justin Trudeau chuan Saskatchewan-a thil thleng chu a rapthlakin rilru a khawih takzet tih a sawi a, nunna chan chhungte leh hliam tuarte a tawrhpui thu a sawi. Pawikhawihtute chu man ngei a tiam.