Scotland aṭangin Queen-in PM thar ruat dawn

Queen Elizabeth-II chuan Conservative Party hruaitu thlan thar, Liz Truss hi Britain PM thar atan a ruat dawn. Mahse kuminah hian ṭum dang a tihdah phung ang ni loin, Scotland aṭangin PM thar tur hi a ruat dawn a ni.

Kum 96 mi, Queen hi a hriselna ṭhat tawk loh vangin Scotland-a Balmoral Castle-ah chawlh a hmang mek a, an ram hruaitu thar hi Buckingham Palace aṭangin ruat ziah ṭhin mah se, kuminah erawh Balmoral Castle aṭang hian a ruat dawn thung.

Vawiinah PM kalchhuak Boris Johnson leh a thlaktu tur hi Queen hian a chawlh hmanna hmunah hian a hmu dawn a ni.

Liz Truss hi kum 2015 hnua Conservative hruaitu, prime minister palina a ni ang. Queen Elizabeth-i rorelna hnuaia PM 15-na tur a ni bawk.

PM thar atana ruat a nih hnuah, Liz Truss hi London lamah kir leh nghalin, vawiin tlai hian 10 Downing Street kawtah thu a sawi nghal ang. PM thar hian naktukah House of Commons-ah a inlan dawn a, a cabinet turte pawh a ruat nghal ang.