Sierra Leone-ah chin hriat lohin mi 600 an awm

Sierra Leone ram khawpui, Freetown-a Regent area-a leimin leh lei tawlh avanga thi chu mi 400 an tling tawh a, hetih lai hian khawpui chhung hmun dangah tuilian avangin harsatna a thleng mek bawk.

Thuneitute chuan Freetown khawpuia leimin leh tuilian thleng mekah hian chin hriat lohin mi 600 vel an awm niin an sawi. Red Cross chuan leiminin a chhilhte ruang lakchhuah hna hi ngawrh taka thawh mek a nih thu leh, chin hriat loha awmte pawh zawn mek an nih thu a sawi. Chhanchhuah hna thawhna kawngah Sierra Leone sorkar pui turin UN chuan team a tir tawh bawk.

Leimin vanga thite hi nimin khan a huhoa phum an ni.

Sierre Leone President Ernest Bai Koroma chuan chhiatna rapthlak tak thleng avanga thite chu ram pumah ni sarih chhung sun an ni dawn tih a puang. He chhiatna thleng hi kum 20 chuang chhunga an rama chhiat­na thleng rapthlak ber a nih thu a sawi.

President chuan an ramin chhiatna a tawh avangin national emergency a puang bawk a, leimin leh tuilian avang­a harsatna tawk mekte ṭanpui leh chhawmdawl hna thawk turin mipuite chu an theihtawp chhuah turin a ngen bawk.

Mitthi-te sunna hun hi August 16 aṭanga August 22 thleng neih a ni ang a, hemi chhung hian hnam puanzarte chu a ngul chanve-ah zar an ni ang. Vawiin chhunlaiah mitthite sunna atan mipuite chu an awmna hmunah ṭheuh minute khat ngawi rengin an ding dawn bawk a ni.

Sierre Leone-in chhiatna rapthlak tak a tawh mekah ṭanpui tur hian Israel a che chhuak hmasa ber a, ei tur ṭhahnem tham tak a thawn lut nghal a ni. Israel ambassador Paul Hirshson chuan damdawi lama puihna pawh an pe leh thuai dawn tih sawiin, harsatna tawk mekte chhawmdawlna kawngah Sierra Leone sorkar chu an thawhpui zel dawn tih a sawi.

Commonwealth leh African Union pawhin Sierra Leone-in chhiatna a tawh chu an tawrhpui thu sawiin, an theih anga puih an tiam bawk.