Colombia-in FARC nena indona a tawp tih a puang

Colombia President Juan Manuel Santos chuan kum 50 zel Revolutionary Armed Forces of Colombia (FARC) hel nena an indona a tawp chiang ta tih a sawi.

FARC leh Colombia sorkar hian inremna thuthlung an lo ziak tawh a, helho hian an ralthuamte sorkar kutah an pe lut tawh a ni. Helho ralthuam peklutte hi tih­chhiat niin, Thawhlehni khan ralthuam tihchhiat tur zinga a hnuhnung ber chu phurchhuah an ni ta a ni.

Pondores-a inkhawm buatsaihah President Santos chuan, “Buaina chu a tawp ta a, kan ramin bul thar a ṭan dawn ta a ni”, a ti. Hei hi an ram tana thil hriatreng tur a nih thu a sawi bawk.

FARC helpawl hian sorkar nena inremna an siam hnuah ralthuam 8,000 chuang bakah, silai mmu maktaduai 1.3 vel an pelut niin United Nations chuan a sawi. Ralthuam an pe luhte hi nikuma FARC leh Colombia sorkarin inremna thuthlung an ziah hriatrengna, monument pathum siamna tan hman ani dawn a ni.

Inremna thuthlung an ziah hnuah FARC hel 7,000 chuang chu sorkar kutah an inpe tawh a ni. Inremna an siam angin FARC hi political party angin a ding zui ang a, kum 2026 hma chuan Congress-ah unelected seat 10 pek an ni ang a, hel inpe zinga a tam ber chu ngaihdam an ni bawk ang.