Ni khatah ruihhlo zuar mi 32 tihlum

Philippine police-te chuan an rama ruihhlo do beihpui thlakna kal zelah, hmarlama Balcuan province-ah Thawhlehni khan ruihhlo zuar mi 32-te chu police-te nen an inbeihnaah kahhlum an nih thu an sawi. Mi 109 man an ni bawk.

Kum khat liamtaa President Rodrigo Duterte-an an rama ruihhlo do beihpui thlakna a hawn aṭang khan Thawhlehni-a ruihhlo zuar mi 32 kahhlum hi nikhat thil thua thi an tam ber ṭum a ni.

Bulacan province-a beihpui thlaknaah hian methamphetamine gram 200, marijuana gram 786, grenade leh silai mu eng emaw zat man a ni bawk.

Police record-a lan danin beihpui thlak a nih hnu hian ruihhlo zuar leh hmangsualte nia puh mi 3,200 chuang chu dan kengkawhtute nena an inbeihnaah kahhlum an ni tawh a, hei bakah hian ruihhlo kaihhnawiha inbeihnaa thi mi 2,000 chuang an awm bawk.

Ram hrang hrangte chuan President Duterte-a kaihhruai sorkarin ruih­hlo do beihpui a thlak dan hi an sawisel a, human rights group pawhin beihpui thlak hnuah law enforcement agency-te kuta thi hi sorkarin a sawi aiin an tam zawk tih a sawi. Pawikhawihna leh thihna thleng chungchanga President Duterte inhnam­hnawih dante chhui chian a phut bawk.