Korean peninsula-ah indona a thleng lo ang SKorea President

South Korea President Moon Jae-In chuan Korean peninsula-ah indona a thleng lo ang tih a sawi.

President chuan North Korea-in nuclear leh missile programme a kalpui chungchangah US-in sipai chakna hmanga beih a tum a nih chuan lo dang turin South Korea chuan thuneihna a nei a ni, a ti.

President dinhmun a chelh ni 100-na puala nimina press conference a neihah Moon Jae-In chuan he thu hi a sawi­chhuak a, “South Korea chuan Korean War-in thil a tihchhiat tam takte din thar leh turin theihtawp kan chhuah mek a, indo a thlen leh hi kan duh lo a, eng kawng pawhin ka theihtawpin ka dang dawn a ni”, a ti. South Korea mipui zawng zawngte hnenah indo a thleng dawn lo tih ring ngam tura a duh thu a sawi bawk.

US President Donald Trump chuan NKorea-in missile programme a kalpui chhunzawm zel chuan mei leh kat hmanga chhanletah a vau a, ralthuamte pawh hman mai theih turin peih a ni tih a sawi a ni. Hei hi NKorea chuan chhang letin, Pacific-a US territory, Guam thliarkar chu missile hmanga kahah a vau let ve leh a ni.

SKorea President chuan Korean peninsula-a sipaite chet lak dan tur­ah an remtihna tel loin engmah a titheih lo tih a sawi a, US leh President Trump ngei pawhin NKorea chungchanga an hmalak dan turah, NKorea berawn hmasa tur leh an remtihna an hmuh chauhin thutlukna siam a ni dawn tih an sawi a ni, a ti.

Korean War zawh hnuah venhimna lama pui turin South Korea-ah hian US sipai dah an ni a, tunah hian US sipai 28,500 an awm mek a ni. Mahse President Moon chuan an rama US sipaite chet dan tur chung­changah thuneihna sang tak an neih thu a sawi a ni. US leh South Korea sipaite hian ni 10 awh tur Ulchi Freedom Guardian joint exercise chu kar leh Thawhṭanni aṭang khian an nei ṭan dawn a, he hunah hian sipai sang tel an tel ang.

Hetih lai hian North Korea hotu lu ber, Kim Jong-un chuan Guam thliarkar beih an tum chungchangah US chet dan ngaihchan phawt an tum tih a lo sawi ve tawh bawk. North Korea sipaite chuan missile hmanga Guam thliarkar bul tuipui kah dan tur hi an ruahman fel tawh a, Kim Jong-un pawh entir tawh niin, president hian thutawp a siam dawn a ni.