US-in firfiak pawlah Hizbul Mujahideen puang
US chuan Pakistan-a hmunpui nei, Hizbul Mujahideen chu Foreign Terrorist Organisation-ah a puang.
US Department of State-a thupuangtu chuan Hizbul Mujahideen, Hizb-ul-Mujahideen tia hriat bawk hi Immigration and Nationality Act hnuaiah Foreign Terrorist Organisation-a puan a nih thu a sawi. US sorkar chuan Hizb hotu Syed Salahuddin, Mohammad Yusuf Shat tia sawi bawk chu Specially Designated Global Terrorist-ah a lo puang tawh bawk a ni.
Kum 1989-a din, Hizbul Mujahideen hi Kashmir-a helpawl lian leh upa ber zinga mi a ni. Pawikhawihna hrang hrangah an inhnamhnawih a, kum 2014 April thlaa Jammu and Kashmir-a pawikhawihna thlenga mi 17-in hliam an tawrh phahna pawh kha an pawl tih niin an chhal a ni.
US-in Foreign Terrorist Organisation-a a puan tak avangin US-a an thil neih leh bank account-te pawh khawih chet theih loin hreksak an ni ang a, America miten an pawl tana sum pek khapsak a ni bawk ang.