Sierre Leone-ah mitthite phum hun sawn

Sierre Leone rama leimin avanga mi 400 zet thite a huhoa phum hun tura ruahmana chu sawn a ni.

Health official chuan mitthite hi an chhungten an enfiahna hun siam a nih dawn avangin phum hun tur hi sawn a nih thu a sawi. Hetihlai hian mitthi 400 zinga a zahvel vel chu an nihna hriatchian ni tawhin phum an ni tawh bawk.

Mitthite hi Waterloo-a thlan lian tak siamah phum an ni a, he thlanmual hmun hi kum 2014-a Ebola hri leng avanga mi 4,000 dawn thihna a thlen hnua siam a ni a, Ebole cemetry tia vuah a ni.

Thawhṭanni zing khan ruahsur nasa avangin Sierre Leone khawpui, Freetown-a Sugar Loaf tlang chu nasa takin a min a, leimin hian mi tam tak a chhilh hlum a ni. Leiminin a chhilh hlum zingah hian naupang 100 an tel a, chin hriat lohin 600 vel an la awm mek bawk.