Britain PM thar atan Liz Truss lakluh a ni

Britain Prime minister ni lai Boris Johnson thlakin kum 47 mi, Liz Truss chu nimin khan Britain PM 56-na atan lakluh a ni.

Liz Truss hi a hriselna ṭhat tawk loh avanga Scotland-a inenkawl mek, Queen Elizabeth hmu tura zinin, Queen hian Britain PM thar atan a lo ruat a, sorkar thar din turin a lo hrilh nghal bawk. Truss hi hmeichhiate zingah Britain PM ni thei pathumna a ni.

Truss hian rorellai, Conservative Party hruaitu tur thlanaah a khingpui Rishi Sunak a hneh a ni. Kum ruk chhunga Con-servative Party aṭanga PM ni thei palina a ni bawk.

Prime Minister thar hian an ram economy siamṭhat tur te, thil man sang zel thunun tur te leh energy lama harastna an tawh mek chingfel turtein hmabak hautak tak a hmachhawn nghal dawn a ni.

Truss chuan, "Kan ram ropui tak kaihruai thei tura ka chunga rinna in nghah avangin ka lawm e," tiin, "Hun harsa paltlang turin hmalakna huaisen tak tak ka siam dawn a, United Kingdom theihna tak tak pholan a ni ang," a ti.

Kumin July thla khan hun rei tak chhung Johnson kaihhruai rintawk lohna lantir a nih hnuah, a minister-te chuan a chungah rinna an nghah ngam tawh loh avangin banna an thehlut a, Johnson pawh hi a bang zui ve leh a ni. Johnson hian Downing Street kawtah thlahna thu a sawi zawhah, nimin khan Scotland-a Balmoral Castle-ah PM a nihna aṭangin banna a thehlut a, Truss hian zuiin PM thar atan hian ruat a ni ta nghal a ni. Prime Minister thar hian a cabinet turte pawh a ruat fel nghal ang.