China lirnghing vangin mi 65 chuang thi tawh

China chhim thlang, Sichuan Province-a Thawhṭannia magnitude 6.08-a naa lirnghing vanga thi chu mi 65 an tling tawh a, chin hriat lohin mi tam tak an la awm bawk.

Chhanchhuah hna thawktute chuan thingtlang khaw hrang hranga lirnghingin chhiatna a thlenna hmunahte chhanchhuah hna an thawk mek. Mi 200 chuang chhiatna thlenna hmunah an tang mek a, mi tam tak an chin hriat lohin an la awm bawk a ni. Hliam tuar mi 250 vel awmin, an zingah hian ngaihtuahawm tak tak an awm.

Thawhṭannia lirnghing hi tlang ram, Tibetan Plateau hmawra tectonic plates intawhna lai, Luding county-ah thlengin, lirnghing hi a thleng zing hle a ni. Tualchhunga meteorological department chuan ni thum chhungin Luding county chuan ruahtui ṭhahnem tak an dawn tur thu sawiin, hei hian chhanchhuah hnathawh a tihkhaihlak dawn a ni.

Nimin khan lirnghinna biala cheng mi 50,000 chuang chu sawnchhuah an ni tawh. Lirnghing hian chenna in 243 chu luah zui tlak lohin a tichim a, in dang 13,010 pawh an chhe tel bawk.

President Xi Jinping chuan a theih dan ang anga chhanchhuah hna kalpui turin thupek a tichhuak dawn a, People's Liberation Army (PLA)pawh tir turin a ti. Chhanchhuah leh chhawmdawl hna thawk tur hian emergency worker 6,500 chuang tirh an ni tawh.

China-ah tunhnaia lirnghing na ber chu kum 2008-a magnitude 7.9-a na kha niin, hemi ṭum hian mi 90,000 dawn chu thi leh an chin hriat lohin an awm.