Radiation vanga chhiatna rapthlak tak tawng thei reng kan ni : Zelenskyy

Ukraine president Volodymyr Zelenskyy chuan kangmei chhuak vanga Zaporizhzhia nuclear power plant-a reactor khar a ngaih hnuah, radiation vanga chhiatna rapthlak tak tawng thei reng an nih thu a sawi.

UN atomic watchdog, International Atomic Energy Agency (IAEA) team chuan Zaporizhzhia nuclear power plant hi a hmunah kalchilhin an enfiah a, UN Security Council hnenah report an pek hmain plant-ah hian kangmei a chhuak a ni.

Ukraine leh Russia-te chuan plant bul hnai bomb hmanga beiah an inpuh tawn reng a ni. Russia-in Ukraine a run hnu lawkah, Russia sipaite hian he plant hi an thunun a, mahse Ukraine hnathawktuten an enkawl thung.

State-run company, Energoatom chuan plant bul beih a nih avanga kangmei chhuakin power line a tihchhiat avangin, power unit (reactor) No 6 chu khar a ni tih a sawi. He reactor hi Zaporizhzhia plant-a reactor paruk awm zinga la hman theih awmchhun a ni. Kar liam ta Inrinni khan reactor 5-na chu khar a lo ni tawh bawk.

UN nuclear agency chuan Ukraine-a backup power line chu kangmei hian a tihchhiat thu sawi mah se, kangmei ṭhelhmih a nih veleh connection hi dan pangngaia pek leh theih a nih tur thu a sawi. 'Grid aṭanga off-site power supply leh back-up power supply system-te chu nuclear vawnhimnan a pawimawh a ni,' tiin IAEA chuan a sawi.

Thawhṭanni zana thu a sawiah, President Zelenskyy chuan Russia chu IAEA ngai pawimawh lohah a puh a ni.

Mi 14 awmna, IAEA team hian kar hmasa khan Zaporizhzhia tlawhin, agency hotu Rafael Grossi chuan inbeihna avanga site hi chhia a nih thu a sawi.Nimin khan IAEA team hian an thil hmuh dan report tihchhuah an tum.