Khawvelah Covid-19 kai mtd 3.5 an awm tawh

Khawvel ram hrang hrangah coronavirus kai chu mi maktaduai 3.52 an awm tawh a, mi 2,46,910 in an thihpui tawh a ni. 

n     Germany-ah chuan Pathianni khan hri kai hi 679 awm belhin, mi 1,63,175 in he hri hi an kai tawh a, an zinga 6,692 in an thihpui tawh. 

n     Russia-ah pawh Pathianni khan hri kai thar an tam ber ni a ni a, mi 10,633 in kai tharin, an ram puma hri kai awm zat hi 1,34,687 an tling tawh. 

n     Italy chuan kar kua chhung zet inkharkhipna a kalpui chu nimin aṭang khan a thlahdul ṭan a, construction site leh factory-ahte hna thawh chhunzawm ṭan niin, sum­dawnna hmun ṭhen­khat pawh hawn phalsak an ni. 

n    Spain pawhin kar sarih chhung an inkharkhip hnuah kar liamta Inrinni aṭang khan khuahkhirhna a thlahdul ṭan. Insawizawi tura pawn chhuahte phalsak an ni.

n     France chuan lockdown chu May 11 aṭang hian thlahdul a tum a, mahse ram puma health emer­gency a puan erawh chu July 24 thleng atan a pawt sei thung. May 11 aṭang chuan dawr hawn a ni tawh dawn a, mipuite pawh phalna la kher loin pawn an chhuah phalsak a ni tawh ang. 

n     US-ah hri kai hi maktaduai 1.16 chuang an awm tawh a, mi 67,821 in an thihpui tawh a ni. 

n     US secretary of state Mike Pompeo chuan khawvela hri leng mek, coronavirus chu Chinese laboratory aṭanga lo chhuak ngei a ni tih finfiahna ṭha tak a awm tih a sawi. 

n     Brazil-ah Pathianni khan hri kai thar 4,588 awmin mi 275 an thi. 

n     Mexico-ah Pathianni vek khan hri kar thar 1,383 an awm a, hemi ni vek hian he hri vang hian mi 93 an thi. 

n     Pathianni khan China-ah hri kai thar mi pathum an awm. China rama hri kai zat hi  82,880 niin, mi 4,633 in an thihpui a ni. 

n     Japan prime minister Shinzo Abe chuan hri leng vanga state of emergency a puan chu May thla tawp thleng pawhsei a tum. 

n     Australia-ah Pathianni khan hri kai thar mi 26 an awm a, an zingah hian mipa naupang kum sarih mi a tel. 

n     New Zealand-ah chuan March 16 hnu lama a ṭum khatna turin Pathianni khan hri kai thar an awm lo. 

4    Jordan chuan economic activity-a khuahkhirhna a siam zawng zawnga a titawp. 

4    UAE khawpui Abu Dhabi-ah chuan mall hawn ṭan a ni tawh a, mahse customer neih theih zat erawh khuahkhirhna siam a ni. 

4    Tanzania-a kel leh thei sample  an endikna chu a positive vangin president John Magufuli chuan an test kit neih chu hman tlak lohah a ngaih thu a sawi. 

4    Nigeria-ah nimin aṭang khan lockdown thlahdul ṭan a ni. 

4    Africa ram eng emaw zatah hna thawh chhunzawm a nih theih nan khuahkhirhna thlahdul ṭan a ni a, mahse mipui punkhawm erawh khap a la ni thung.