France-in July 24 thleng emergency pawtsei

France sorkar chuan an rama Covid-19 leng vanga health emergency a puan chu July 24 thleng a pawtsei tih health minister Olivier Véran chuan a sawi.

Rampawn aṭanga rawn lutte chu kar hnih chhung khunghran an ni zel dawn tih Olivier chuan a sawi bawk. Hri leng vang hian March 24 aṭang khan France-ah hian health emergency puan a ni a, ramchhunga mipuite him zawk nan thla hnih dang puan belh leh a ngai tih Olivier chuan a sawi bawk.

May 11 aṭangin in­thlahdulna kalpui tum ṭan a ni a, thuneitute hnena phalna lak kher ngai tawh loin mipuite paw'n pawn an chhuak thei tawh ang.  Vantlang lirthei an chuannaah hmaikawr (mask) vuah tir vek an ni dawn a, dawr ṭhenkhatte hawn a nih dawn bakah, primary school-te pawh hawn chhoh tum a ni.

Hri leng vanga eco­nomy lama harsatna an tawh chhoh mek tihziaawm a nih theih nan, hnathawktu ṭhenkhatte pawh an hna thawh phal a ni tawh dawn a, national rail operator SNCF chairman chuan ramchhunga hri leng vanga inkhuahkhirhna avangin, an company chuan US dollar tluklehdingawn 2.2 a hloh tih a sawi.

France-ah hian hri kai hi mi 168,693 an awm tawh a, heng zinga mi 50,784-te chu enkawl dam tawh niin, mi 24,895-in he hri hi an thih pui tawh a ni. France hi Europe a hri kai tamna leh thi tamna ber palina a ni mek.