Blue Whale challenge : Goa Police-te’n thurawn tichhuak

Kerala leh Maharashtra-ah rawlthar pahnih chu online game, Blue Whale challenge an khelh hnuah an intihhlum avangin Goa Police-te chuan online game chungchanga an fa leh naute venhimna tur ngaihtuah turin nu leh pate tana thurawn an tichhuak.

Crime Branch chuan Ni­ngani zan khan nu leh pate tana thurawn an siam hi ti­chhuakin, nu leh pate chu an fate computer leh mobile phone-ah parental control software install tur leh, application an hman theih chin bithliah siamsak turin an ti a ni.

Superintendent of Police (Crime Branch) Karthik Kashyap chuan Blue Whale challenge kheltute hian depression emaw, mahni intihlum duhna emaw an neih phah thei tih a sawi. Naupangte awmdan a danglam leh danglam loh ngun taka thlithlai reng turin nu leh pate an ngen a, an search history pawh ensak ṭhin tur te, Facebook, Snapchat, WhatsApp leh a dang hmanga an fate text message, call log-te endik fo turin a chah. An fate tana site tlawh hlauhawm nia an hriat leh apps ṭha lo an tihte chu block vek turin a ngen a ni.

Blue Whale challenge hi Russia mi Philipp Budeikin siam a ni a, he game kheltute chu tihtur hrang hrang tuk an ni ṭhin a, stage 50 awmin mahni intihnat te, intihlum turtein tih an ni. Khaw­vel hmun hrang hrangah he game vang hian naupang 100 chuang an intihhlum phah tawh nia sawi a ni.