Barcelona-a pawikhawihna thlengah mi 13 an thi

Spain-a Barcelona-ah Ningani tlai khan mi pakhat chuan van motor hmangin Las Ramblas bialah mipui a pawng chil a, mi 13 an thi a, mi dang 100 chuanin hliam an tuar.

Spain police-te chuan van khalhtu hian an ram huna tlai lam dar 5-ah pawikhawihna hi a thlen niin an sawi. Las Ramblas hi Barcelona khawpui chhunga kawtthler lun tak, khualzin tam tak awmna hmu a ni a, km 1.2 vela thui niin dawr leh restauran-te an awm tlar a ni.

Police-te chuan motor khalhtu hi pawi a khawih hnu hian a tlanchhe nghal tih sawiin, zawn mek a la ni, an ti. He pawikhawihna thlenga inhnamhnawiha rinhlelh mi dang pahnih chu man an ni tawh. Barcelona-a pawikhawihna a thlen hnu lawk, nimin zing khan Cambrils seaside resort-ah car hmangin mipuite pawng chilh an ni leh bawk a, civil mi paruk leh police officer pakhatin hliam an tuar. Police-te chuan Cambrils-a pawikhawihna thlenga inhnamhnawih mi panga an kaphum niin an sawi a, Cambrils leh Barcelona-a pawikhawihna thleng hi a inzawm niin an ngai bawk.

Islamic State (IS) news agency, Amaq chuan an telegram messenger account-ah Barcelona-a pawikhawihna hi IS mi leh sa tih a nih thu a sawi a, an hming erawh a tarlang tel lo. Amaq chuan IS chuan an pawl laka beihpui thlaktu, US kaihhruai ṭangrual pawla tel ram hrang hrangte lakah phuba a lak tur thu hi a lo sawi tawh a ni. Nikum chhung pawh khan Europe ram hrang hrangah hetiang ang chi pawikhawihna hi an thlen fo niin a sawi. Catalonia interior minister Joaquim Forn chuan Barcelona-a pawikhawihna thlenga thi zat hi tarlangin, hliam tuar zingah ngaithuahawm tak tak an awm avangin thi zat pawh hi an la punchhoh a rinawm thu a sawi.

Catalan police hotu, Josep Luis Trapero chaun Nilaini kan khan Barcelona chhim lam km 200 vela hla, Alcanar khuaah bomb puak avangin mi pakhat a thi bawk niin a sawi a, he thil thleng hi Barcelona-a pawikhawihna nen pawh inzawmna nei niin a sawi.

Spain Prime Minister Mariano Roy chuan pawikhawihna a thlen hnu hian Barcelona khawpui hi a pan nghal a, pawikhawihna thlenga thite sunna chu ram pum huapin ni thum chhung neih a nih tur thu a sawi. PM Roy chuan firfiakte pawikhawihna thleng chu a dem thu sawiin, he thil thlen hian Spain mipuite a tipumkhat zawk a, an ram beitute do let turin lungrual takin an thawk zel dawn tih a sawi.

Ram hrang hrang hruaitute pawhin Barcelona-a pawikhawihna thleng hi an dem thu an sawi a, Russia President Vladimitr Putin chuan Spain lal King Felipe VI hnenah a tawrhpui thu sawiin, he thil thleng hian firfiaka chetna do let tura khawvel pum an ṭanrual a ngaihzia a tilang chiang hle a ni, a ti. US Secretary of State Rex Tillerson pawhin Spain sorkar an tawrhpui thu sawiin, pawikhawihtute manchhuah an nih theihna turin US chuan puih zel a inhuam tih a sawi. France President Emmanuel Macron, Germany Chancellor Angela Merkel, Britain Prime Minister Theresa May leh European Commission President Jean-Claude Juncker-te pawhin an tawrhpui thu an thawn a, Pope Francis chuan thihna thawk chhungte leh hliam tuarte a ṭawng ṭaisak thu a sawi bawk.