Palestinian activist thawn hawna tur thupek tichhuak

US District Judge Gershwin Drain chuan an rama Palestinian activist, Ramea Odeh-i chu US citizen a nihna a hlihsak bakah, Palestinian lama thawn haw turin thupe a tichhuak.

Judge chuan Odeh-i hian kum tam tak liamtaa Jerusalem-a bomb tihpuah kaihhnawiha thiam loh chantir a nih chungchang a lo zep avangin thawn haw turin a ti a ni. Hetih lai hian Odeh-i chuan bomb tipuahnaa hian a inhnamhnawih nia inpuang turin Israel sipaite chuan an nawr lui a, kut pawh an thlak niin a sawi thung.

Kum 70 mi, Odeh-i hian kum 1994 khan US lutin, a hnua citizenship a dilnaah thiam loh chantir a nih tawhna hi a zep a, hei vang thiam loh chantir a lo ni tawh a ni. Court-ah a inlan hian Odeh-i chuan Israel leh US chu sawiselin, firfiak a nih loh thu a sawi a, mahse Judge Drain chuan court chu Israel-Palestinian buaina chungchang sawichhuahna tur hmun a nih loh thu leh, citizenship a dil dawna a thil ziah chungchang ngaihtuahna hmun zawk a nih thu a sawi.

Kum 1970 khan Odeh-i hi Jerusalem supermarket-a ṭum hnih bomb tihpuahna thleng kaihhnawihah thiam loh chantir a ni a, he bomb puakah hian mi pahnih an thi a ni. Kum 1979 khan Israel leh Palestinian-in tang an inthlengnaah chhuah a ni. US-ah hian kum sawmhnih chuang a cheng tawh a, Aran American Action Network-ah associate director a ni.