China mawhpuhna tur finfiahna a awm : Mike Pompeo
US secretary of state Mike Pompeo chuan khawvela leng mek, Covid-19 chu China-a Wuhan laboratory aṭanga rawn chhuak a ni tih finfiahna a awm ngei a ni, a ti.
Hri leng mek chung changah US chuan China hi na takin sawiselin, mawhphurtuah a lo puh fo tawh a ni. China chu he virus chung changa thil pawimawhte ram dangte laka zepah te a puh tawh, WHO pawh China lam awnah a puh avangin a fund pek pawh a titawp hial tawh a ni.
Pathianni khan US secretary of state Mike Pompeo chuan American Network television-in an kawmnaah, Wuhan-a virology laboratory aṭangin he hri hi a rawn darh tih finfiahna a awm a ni, a ti.
Hemi chungchang hi an lo sawi fo tawh a, tunah chuan khawvel pumin a hre thei tawh dawn a ni tiin, Pompeo chuan China chuan ram danga hri a tihdarh chanchinte pawh a lo nei tawh a, laboratory ṭha tawk loa siamte pawh a lo nei fo tawh a ni, a ti.