Sierra Leone leimina thi 1,000 an tlin ring
Sierra Leone khawpui, Freetown-a kar kaltaa leimin nasa tak avanga thi chu mi 1,000 an tlin rin a ni a, leminin a chhilhte ruang zawn hna thawh chhunzawm mek a ni.
Leiminah hian mi 450 an thi tih hriatchian a ni tawh a, hetihlai hian chin hriat loha awm mi 600 chuangte pawh dama hmuh beiseina a tlem tawh a ni.
Hri leng hlauhthawn avangin ruang hmuhte pawh a ruala phum nghal zel an ni a, hetih lai hian ruang la hmuh loh tam tak an awm avangin hei hi hriselna atan a hlauhawm phah thei dawn nia sawi a ni. Kum 2012 khan tuihri, cholera leng vangin mi tam tak an lo thih phah tawh a ni.
Ruah a la sur chhunzawm zel dawn nia sawi a ni a, hei vang hian leimin leh chirh tawlh pawh a la thlen leh a hlauhthawnawm nia sawi a ni bawk.
Leimin avanga chhiatna rapthlak tak thleng hian chhungkaw 1,600 vel a nghawng a, heng mite hi chhawmdawl ngaiin an awm mek a ni.
Britain sorkar chuan chhiat tawkte chhawmdawl hna thawhna atan Sierre Leone sorkar chu pound maktaduai 5 a pe. International Federation of Red Cross and Red Crescent Societies (IFRC) chuan khawvel ram hrang hrangte hnenah Sierre Leone ṭanpui tur hian a ngen a, chhiatna tuartu mi 4,600 te ṭanpuina turin Swiss francs matkaduai 4.6 chu hmanhmawh taka mamawh a nih thu a sawi.