Iraq sipaiten Tal Afar-ah beihpui thlak

Iraq sipaite chuan Islamic State (IS) firfiakte kut aṭanga Tal Afar khua laklet tumin beihpui an thlak mek. Tal Afar hi IS-te’n khawpui pawimawh an la luah tlemte zinga mi a nih thu official chuan a sawi.

Prime Minister Haider al-Abadi chuan beihpui thlak a nih thu hi TV-ah a sawichhuak a, firfiakte chuan inpek emaw, thih emaw lo chu thlan tur dang an nei tawh lo a ni, a ti. Iraq sipaite hian July thla khan an ram khawpui pawimawh, Mosul chu firfiakte kut aṭangin an la let tawh a, hemi hnu hian Tal Afar laklet tum hian an bei zui nghal a ni.

Tal Afar-a cheng tam ber chu Shia-Muslim niin, kum 2014 aṭang khan IS kutah a awm a ni. Mosul leh Syria ramri inkara awm a nih avangin firfiakte mamawh chawk luhna kawng pawimawh tak a ni.

Iraq indo thlawhtheihna hmangin khawpui chhunga IS hmunte chu ni eng emaw zat bomb an ni tawh a, hemi hnu hian khawmual sipaiten an bei zui ve leh nghal a ni. Iraq sipaite an an thawhpui, Shia pawl leh Kurdish Peshmerga fighter-te chuan Tal Afar hi an hual tawh a ni.

Iraq sipai commander, Maj-Gen Najm al-Jabouri chuan khawpui chhunga hian firfiak hi 1,500 - 2,000 vel an la awm niin a sawi a, an chhungte erawh chuan khawpui hi an chhuahsan tawh a ni, a ti.