Philippines-a kohhran hruaituin ruihhlo zuar nunna lak titawp turin ngen

Philippine sorkarin an rama ruihhlo do beihpui a thlak mek­ah ruihhlo zuar leh hmangsuala nia puh mi tam tak tihlum an ni tawh a, sorkar chet dan hi ram leh pawl hrang hrangte chuan an lo sawisel fo tawh a ni.

Kar hmasa khan police-te chuan ruihhlo zuar dap hna an thawhnaah mi 76 vel an kaphlum leh a, an zingah hian rawlthar kum 17 mi pawh a tel a ni. He thil thleng hi human rights group bakah legislator-te chuan sawiselin, Philippine President Rodrigo Duterte-a flagship campaign chu insuatna ang maia a chan thu an sawi.

Pathianni khan Catholic Church hotu, Manila Cardilna Luis Tagle chuan Sunday mass hmannaah mi tam tak nunna laksak an ni ṭhin chu titawp tura a duh thu a sawi. Dan kalha ruihhlo zawrh ṭhin chu politics khelhna hmanrua atana hmang lo tura a duh thu a sawi a, he thil hian an ram mipui zawng zawng a nghawng a ni, a ti.

President Duterte hian thla 14 kaltaa thuneihna a chan aṭang khan an rama ruihhlo do beihpui thlak hi a kalpui nghal a, beihpui thlak chhung hian ruihhlo zuar leh hmangsual nia puh mi 3,500 chuang tihhlum an ni tawh a ni. Police-te chuan heng mite hian an beih let avangin mahni invenna atana tihhlum an ni tawh thu an sawi.