IAEA-in Ukraine nuclear power plant-ah 'Security zone' siam a rawt

Ukraine-a Zaporizhzhia nuclear power plant enfiahtu, International Atomic Energy Agency (IAEA) chuan Russia awpna hnuaia awm mek, nuclear power plant awmna hmunah 'security zone' siam a rawt.

UN atomic watchdog, IAEA chuan nuclear plant chhehvelah inbeihna a thlen fo avangin, kar liam ta khan nuclear plant dinhmun enfiah hian an tlawh a ni. Thawhlehni khan UN Security Council-ah report thehlutin, tun dinhmunah chuan plant hi indona thleng mek lakah venhim hleih theih loh dinhmunah a awm mek niin an sawi.

Europe khawmuala nuclear power plant lian ber, Zapo­rizhzhia plant bula beihna thleng ṭhin hian nuclear lama chhiatna rapthlak tak a thlen hlauhthawnna nasa tak a siam a, hetih lai hian Russia leh Ukraine chu plant bul vel bomb-tuah hian an inpuh tawn a ni.

IAEA chuan, "Sipaite in­beihna avanga nuclear accident pawi tak thleng tur venna atan, ruahmanna a rang thei anga siam a ngai a ni," tiin, nuclear safety and security protec­tion zone siam chauhin venhim theih a ni dawn a ni, a ti.

Hemi rual hian nuclear plant awmna leh a chhehvel beihna thleng ṭhin chu, chhiatna rapthlak zawk a thlen lohna turin titawp turin IAEA chuan a ngen bawk.

Report hi inspection team hotu, IAEA director-general Rafael Grossi chuan Thawhlehni khan UN Security Council-ah a pe a ni.

Grossi-a'n report a pek hma hian, UN secretary-general Antonio Guterres chuan Russia leh Ukraine sipaite chu plant leh a chhehvela inbeihna titawp tur leh, hmun him siam turin a lo ngen tawh. Inbeihna kal zelah tum reng vang emaw, tihpalh thil emawa plant hi tihchhiat a nih hlauh chuan, chhiatna rapthlak tak a thlen theih thu a sawi.