Britain PM thar Liz Truss-i'n a cabinet tur puang ; Ministerial post pawimawhah mi ngo mipa an awm lo

Britain prime minister thar Liz Truss chuan a cabinet thar turte puangin, a vawi khatnan ministerial post pawimawh paliah mingo mipa an awm dawn lo.

Liz Truss hian kum 1960 chhoa Ghana aṭanga pem lut thlah, Kwasi Kwarteng chu finance minister atan a ruat a, foreign minister atan James Cleverly ruatin, mi hang zingah he dinhmun chelh thei hmasa ber a ni. Cleverly nu hi Sierra Leone lam mi niin, a pa erawh mingo a ni thung.

Interior minister atan Indian-origin Suella Braverman ruat a ni a, a nu leh pa te hi Kenya leh Mauritius aṭanga Britain-a pem lut an ni.

Britain sorkarah hian hun rei tak chu mingo mipa hlang deuh thawin ro an rel a, hei vang hian Conservative Party pawh hian kum rei vak lo liam ta aṭang khan hnam hrang hrang huam turin, huapzau zawkin Parliament candidate pawh a siam chho a ni. Kum 2002 khan a vawi khatna atan ethnic minority aṭangin cabinet minister hmasa bera tan Paul Boatean chu ruat a ni.

Non-partisan think-tank British Future-a director, Sunder Katwala pawhin, "Politics pawhin hma a sawn zel a, tunah chuan hetianga huam zau taka siam hi thil pangngaiah kan ngai thei tawh a ni," a ti.

Heti chung hian Britain-a chanvo dang pawimawh, sumdawnna, judiciary, civil service leh army-a rank sang zawkte chu mi ngo an la tam zawk tho a ni. Conservative Party pawhin diversity campaign kalpui mah se, Parliament-a party member zingah hmun lia ṭhena hmun khat chauh hmeichhia niin, minority background pawh 6% chauh an la awm.