US Navy lawnglian leh oil tanker insu

US Navy lawnglian leh oil tanker chu nimin zing khan Singapore tuipuiah an insu a, navy lawng hi a sir lam a chhia a, lawng sipai panga-in hliam an tuar.

Navy lawng, guided missile destroyer USS John S McCain hi Singapore khawchhak lam pana a kal laiin, Liberia flag inzarna oil tanker nen hian an insu ta a ni. He thil thlen hun hi Singapore huna zing lam dar 5.24 vel a ni a, an insutna hmun hi Strait of Singapore a ni.

Oil tanker, Alnic MC hi a hmalama a chhe deuh a, mahse oil bua erawh a awm lo. Tanker hi ton 30,000-a rit a ni a, Taiwan aṭanga Singapore-a dah tur oil ton 12,000 a phur a ni. USS John S McCain aiin a let thum zetin a rit a, a sei lam hi US destroyer ft 505 aiin a sei a, feet 600 vel a ni.

US military helicopter bakah, Singapore leh Malaysia navy leh coast guard-te chu chetsualna thlenna hmunah hian kalin chhanchhuah hna an thawk nghal a ni. US Navy chuan lawng sipai palite chuan hliam tuar mah se an ngaihtuahawm lo tih an sawi a, Singapore hospital-ah hruai an ni a, pakhat chu enkawl zui a ngai lo niin a sawi.

Navy lawng hi Singpaore-a Changi naval base lamah a kal nghal a, Alnic MC pawhin Singapore lawngchawlh hmun a pan bawk.

Thla hnih liamta khan US navy lawng, USS Fitzegeral chu Japan tuipuiah lawnglian dang nen an lo insu tawh bawk a, hemi ṭum hian US lawng sipai pasarih an thi a ni.

USS John S McCain hi senator, John McCain-a pa leh apu hming chawia phuaha a ni a, an pahnih hian US Navy-ah admiral ve ve an ni a, he lawnglian hi Big Bad John tia sawi ṭhin a ni bawk. Japan-a Yokosuka-a US naval base-ah dah a ni a, Pacific-a US 7th Fleet partrol zingah a tel a ni. Lawngah hian thawktu, lawng sipai leh officer 300 chuang an awm a ni.