CAR-a buaina chhuakah mi 13 an thi

Central African Republic-ah Pathianni khan Muslim hel pawl leh Kristian armed group-te inkarah buaina a chhuak a, mi 13 an thi.

Buaina chhuahna hmun hi CAR khawpui, Bangui aṭanga km 450 vela hla, Bria khua a ni. Pawl pa­hnih inkara buaina chhuak avang hian mi 13 an thih bakah, midang 20 velin hiam an tuar a, an zinga a tam ber hi civil mi an ni.

Kar kalta Inrini khan ramchhung hmun hrang hrangah buaina a chhuak bawk nia sawi a ni. CAR-a chhawmdawlna hna thawka awm pawl parukte chuan United Nations hnenah kar kalta Thawhlehni khan lehkha thawnin, France colony hlui chu buaina nasa tak chhuak thei mai dinhmunah a ding mek niin an sawi. Hei vang hian buaina nasa zawk chhuak zel tur veng tura hma la turin an ngen a ni. Kumin chhungin tualchhung buaina thleng vangin mi 82 an thi tawh niin an sawi.

Khawvela ram rethei ber zinga mi, CAR-ah hian kum 2013 aṭang khan Muslim leh Kristian armed group-te inkarah buaina a chhuak reng a ni. Kristian President Francois Bozize chu Seleka-a’n a paihthla a, a hnuah France puihnain sipai chakna hmangin Seleka chu paihthlak a ni ve leh a ni. Hemi hnu aṭang hian Kristian leh Muslim-te hi an intibuai fo a, an ram sum lakluhna hmun thununtu zawk nih tumin an inbei reng a ni. Tualchhung buaina thlengah hian mi nuai nga vel chu hmun dangah an tlanchhe tawh a ni.