Hong Kong-ah activist man vangin lungawi lohna lantir

Hong Kong-ah democracy activist pathum man an nih avangin Pathianni khan mipui lungawi loten kawng an zawh.

Kar kalta Ningani khan activist pathum - Joshua Wong, Nathan Law leh Alex Chow-te chu dan kalha punkhawmna buatsaihah puhin man a ni a, thla ruk aṭanga thla riat tang turin hrem an ni. Hei hi duh loin, mipui­te chuan Court of Financial Appeal panin kawng an zawh a, jail-a activist tang mekte chhuah zalen tura an phutna thuziakte an keng a ni.

Pathiannia kawngzawh hi kum 2014-a democracy thlawptuten Umbrella Movement an buatsaih hnua lungawi lohna lantira mipui punkhawm tamna ber an nih thu a huaihawttute chuan an sawi.

Kum 1997 khan British colony hlui, Hong Kong hi ‘one country, two system’ inremna hnuaiah China kut­ah hlan a ni. He inremna siamah hian Hong Kong chu China kuta pek ni mah se, inrelbawlna hran leh zalenna nei tura tih a ni. Mahse China hian a thuhnuaiah dah tumin a bei zel a, hei vang hian Hong Kong mipui tam tak chuan an inrelbawlna kawnga China inrawlh dan hi an duh lo a, lungawi lohna pawn an lo lantir fo tawh a ni.