Afghanistan-ah firfiakte kan bei zel dawn : Trump

US President Donald Trump chuan US-in kum 16 zet indo a lo hmachhawn tawhna, Afghanistan-ah chuan firfiakte an la bei chhunzawm zel dawn tih a sawi.

President Trump hian an ram huna Thawhṭanni zan khan Afghanistan-a hma an lak zel dan tur chungchang hi a sawi a ni. Trump chuan president a nih hma kha chuan Afghanistan aṭanga America sipaite lakchhuah chu a tumdan a ni tih a sawi a, mahse President a nih hnuah chuan sipaite lakchhuah an nih chuan an hmunruak kalsan chu firfiak pawl, al-Qaida leh Islamic State (IS)-te’n an luahkhat mai dawn tih ngaihdan a nei leh ta zawk niin a sawi. Trump chuan Afghanistan leh a chhehvel biala security dinhmun chu a ṭha lo hle tih a sawi a, Afghanistan-ah chuan nasa zawka hma lak an tum thu a sawi. Afghanistan-ah hian an sipaite chu an ram duhdan anga democracy va dintir turin a tir dawn lo tih sawiin, firfiakte that turin a tir zawk tih a sawi. US President chuan Afghanistan-ah hian US sipai engzat nge a tirh belh dawn a sawilang lo a, mahse official-te chuan Pentagon-in a lo rawt tawh angin sipai 4,000 vel tirh a remtih an rin thu a sawi. Trump chuan sipai tirh zat tur chungchang a sawi dawn lo a, Afghanis­tan boruak awmdan a zir zelin hma an la dawn tih a sawi bawk.

Afghanistan ramah hian US sipai 8,400 vel an awm mek a, an tam lai ber chu Obama Barack-a president lai, kum 2010-2011 kha niin, America sipai 100,000 vel an awm a ni.

America mipuite chuan indonaa hnehtu nih loh chu an pawm lo tih sawiin, mipuite ngaihdan pawh a ṭawmpui thu a sawi. “A tawpah chuan hnehna kan chang dawn tho a ni”, a ti.

Pakistan chungchang pawh sawi­chhuakin, US President chuan Pakistan chungah na zawka hma an lak tur thu a sawi a, Pakistan ram chu buaina, tharum thawhna leh rawlrala chete tana hmun him leh nuam a ni, a ti. Pakistan rama firfiak pawlte zalen taka an awm chungchangah US chu a ngawi mai mai tawh dawn lo. US chuan Pakistan sorkar leh sipaite puihna atan dollar tluklehdingawn tel a pe a, hetih lai hian Pakistan chuan US-in a do mek firfiakte chu a ramah zalen leh nuamsa takin a awm tir thung a ni, a ti. Thil awmdan hi thlak danglam a ngai tawh tih a sawiin, Afghanistan-a US hmalakna, a bikin sum lama puihna leh hmasawnna hna thawhna kawngah India puihna a duh thu a sawi lang bawk.