Barcelona-a mi pawng chiltu an kaphlum
Spain-a Catalonia bial khawpui, Barcelona-a motor-a mi pawng chiltu, Younes Abouyaaqoub chu kahhlum a nih thu, Catalan police-te’n an sawi. Barcelona-a pawikhawihna thleng avang hian mi 14 an thi a ni. Catalan police-te chuan Younes Abouyaaqoub hi Subirats-ah Thawhṭanni tlai dar 5 vel khan kahhlum a nih thu leh, Abouyaaqoub hi kar kalta-a Barcelona-a Las Ramblas hmuna mi pawng chiltu a nih thu an sawi.
Police-te chuan Thawhṭanni tlai dar 4 vel khan Subirats-ah mi pakhat rinhlelhawm tak hmuh a nih thu an dawn avangin beihpui an thlak nghal a, Abouyaaqoub an kahhlum lai hian explosive belt lem alo hreng a ni.
Abouyaaqoub kahhlum a nih ve leh tak avangin kar kalta Ningani-a Barcelona-a pawikhawihna thlenga inhnamhnawiha puh mi 12-te chu thah leh man kim an ni tawh a ni. Rinhlelh zinga pahnih hi pawikhawihna thlen tura an inbuatsaih laia in chhunga bomb an tihpuahah an thi a, midang panga chu police-te’n kar kalta Zirtawpni zing khan an kaphlum a, mi pali chu police-te kutah an awm tawh bawk.