Italy-a lirnghingah mi 2 thi
Italy chhim lam, Naples aṭanga km 29-a hlaa awm, Ischia Island-ah Thawhṭanni zan khan magnitude 4.0-a nain lir a nghing a, chhiatna thlengah mi pahnih an thi a, mi 25-in hliam tuarin, chin hriat loha awm mi 10 an awm bawk.
Italian National Institute of Volcanology and Seismology chuan lirnghin hun hi an ram huna dar 8.57 a nih thu a sawi a, Casamicciola Terme municipality-a biak-in chimin nu pakhat a delh hlum a, in chimin mi pakhat a delh hlum bawk. Chin hriat loha awm, mi 10 zingah naupang pathum an tel bawk a ni. Lirnghing hian chenna in eng emaw zat a tichhia a, power line a chhe bawk. Lirnghing tuarte chhanchhuah leh chhawmdawl hna thawktu tur hi Naples khua aṭangin tirh nghal an ni.