Kim Jong-un-a’n rocket engine siam belh turin thu pe

North Korea ram hotu, Kim Jong-un-a chuan solid-fuel rocket engine leh rocket warhead tam zawk siam turin thupek a siam.

Kim hian tunhnaiah Academy of Defence Science hnuaia Chemical Material Institute a tlawh a, he hunah hian solid-fuel rocket engine leh intercontinental ballistic missile warhead siam dan hrilhfiah a nih bakah a hmunte fanpui a ni bawk.

North Korea official news agency, KCNA chuan Kim hian institute hnenah hian solid-fuel rocket engine leh rocket warheat tips tam zawk siam turin a hrilh niin a tarlang. KCNA chuan Kim hian institute official-te chu lawm­thu hrilhin, lawmman pawh a pe niin a tarlang a, an ram tana pasalṭha tiin a ko a ni.

NKorea hian kumi chhungin nuclear test vawi hnih a neih bakah, missile eng emaw zat a lo enchhin tawh a ni. July thla khan khawmualpui dang kap pha tur, intercontinenal ballistic missile ṭum hnih a enchhin bawk a, hei vang hian khawvel ram dangten NKorea hrekna thar an siam phah a ni.

July 28-a missile a enchhin leh avanga US President Donald Trump-a’n a vauna chhang letin, NKorea hian Pacific-a US territory, Guam thliarkar chu missile hmanga kahah a vau a ni. NKorea sipaite chuan missile kahchhuahna tura ruahmanna te pawh peih a ni tawh tih sawiin, Kim Jong-un-a thutluknaah a innghat tawh tih an sawi. August thla chhunga kah an tum thu an sawi hnuah, Kim chuan US chetdan an thlithlai leh phawt dawn tih a sawi.

Hetih lai hian Thawhṭanni aṭang khan South Korea leh US sipaite chuan nunchan an zirho a, August 31 thleng a awh ang. Ram pahnihte hian sipaite nunchan zirho hi kumtin an buatsaih a, hei hi hmelmate an beihna laka inven dan lo zirna atana ti an nih thu an sawi laiin, NKorea chuan an ram run tura an inbuatsaihna nia a ngai thung a, na takin a sawisel a ni.