Venezuela-in prosecutor manna thupek tichhuak dawn
Venezuela President Nicolas Maduro chuan an ram attorney general hlui, kar hmasaa an ram aṭanga tlanchhia Luisa Ortega Diaz-i man a nih theih nan international arrest warrant tihchhuah tir an tum dawn tih a sawi.
Maduro chuan Ortega-i leh a pasal chu dan bawhchhiatna lian tham takah an inhnamhnawih niin a sawi a, Venezuela court chuan an nupa manna tur thupek hi a lo tichhuak tawh a ni. Manna tur thupek tihchhuah a nih hnu hian Ortega-i te nupa hian Aruba thliarkar an pan a, he hmun aṭang hian private jet hmangin Colombia an pan leh nia sawi a ni. Colombia President Juan Manuel Santos chuan Ortega-i hian an ram sorkar hnenah inhumhimna a dil a nih chuan an remtihsak tur thu a sawi.
Hetih lai hian Colombia migration thuneitute chuan Ortega-i hian Brazil ram a pan leh niin an sawi.
Ortega-i chuan regional economic group, Mercosur-in Brazil-a prosecutor leh attorney meeting a neih turah a tel tur thu a sawi a, he hunah hian Venezueal ram dinhmun dik tak sawichhuah a tum thu a sawi.
Venezuela sorakrin an ram danpui siamṭhatu tur, National Constituent Assembly (ANC) a din thar chu Ortega-i hian a sawisel a, ram danpui kalh a nih thu leh, mipuiten an ram aiawh tura an thlan chhuahte awmna, national congress palzutna niin a sawi a ni.