Trump-a’n Afghanistan-ah sipai tirh belh turin UK ngen
US President Donald Trump chuan Afghanistan-a firfiakte chu an beih chhunzawm zel tur thu a sawi a, hemi rual hian Britain pawh Afghanistan-a indona thleng mek atana sum tam zawk pe tur leh, sipai tirh belh turin a ngen.
President Trump chuan Afghanistan-a hma an lak tharna tur chu thlawp turin Nato hnuaia an thawhpui ramte leh ramdangte pawh an ngen dawn tih sawiin, America-in a tihdan anga sipai tirh belh leh, fund pawh tipung turin an ngen dawn tih a sawi. US defence secretary Jim Mattis chuan thuchhuah siamin, Nato leh an thawhpui ram dangte pawh biakrawn a tum thu a sawi a, ramṭhenkhat chuan sipai tirh belh an tum thu a sawi.
Hetih lai hian Afghanistan-a Taliban firfiakte chuan US President Trump-a’n Afghanistan-a policy thar a duan chu an pawm lo tih sawiin, an tan thil thar a ni loh thu an tarlang. Taliban chuan US-in a sipaite a lachhuak lo a nih chuan, Afghanistan ram chu America sipaite thlanmualah an chantir dawn tih an sawi bawk.
Taliban thupuangtu, Zabiullah Mujahid chuan President Trump-a thusawi chungchangah thil thar engmah a awm lo a, Afghanistan rama US sipai pakhat lek pawh a awm chhung chuan an bei let zel dawn tih a sawi a ni.
US hian kum 2001 aṭang khan Afghanistan-a Taliban firfiakte lakah indo puangin sipai a tir lut ṭan a, kum 16 zet an inbei tawh a ni. Afghanistan-a firfiakte a donaah hian US chuan sipai 2,400 vel a hloh tawh a, 20,000 chuangin hliam an tuar tawh bawk.