Britain lal ni rei ber Queen Elizabeth II a thi ; Britain lal thar King Charles III

Britain ram lal ni rei thei ber, Queen Elizabeth II chu Ningani khan kum 96 mi niin, Scotland-a Balmoral Castle-ah a thi.

Queen Elizabeth II hi kum 1952, June 2 khan a lal ṭan a, kum 70 chhung ro a rel a ni. A lal chhung hian Britain hian prime minister 15 a nei hman a, a hmasa ber chu Winston Churchill, kum 1874-a piang niin, a hnuhnung ber chu Thawhlehnia Prime Minister atana a ruat, kum 1975-a piang Liz Truss a ni.

Kum 1926, April 21-a piang, Queen Elizabeth II hi a hming pum Elizabeth Alexandra Mary Windsor a ni. Kum 1947-a pasal, Philip, Prince of Greece nen an innei a, an inneih hnuah a pasal hi Duke of Edinburgh tih a ni. Kum 74 an innei hman a, kum 2021 khan a pasal hian kum 99 mi niin a thihsan. Fa pali, mipa pathum leh hmeichhe pakhat neiin, tu pariat leh tuchhuan 12 an nei.

Queen in a hun tawp a hmanna, Scotland-a Aberdeenshire-a Balmoral Castle hi Queen private property niin, nipui chawlh a hmanna ṭhin a ni a, a pasal hun tawp hnaih lamah pawh he hmunah hian hun an hmang tam hle. Covid hri leng vanga lockdown puan lai leh, kum 2020 November thlaa an inneih champha vawi 73-na pawh he hmunah hian an hmang dun a ni.

Vui hun tur la puang lo
Queen Elizabeth II hi a thih ni aṭanga ni 10 hnuah vui a ni dawn a, Buckingham Palace chuan September 18 nge 19-ah zawk vui a nih dawn a la tichiang lo a ni.

A thih ni aṭanga vui a nih hun thleng hian nitin ni hmingah D dah tel a ni. A thih ni, Ningani kha D-Day tih niin, nimin khan D-Day+1 tih a ni.

D-Day+2-ah a ruang hi Balmoral aṭangin Edinburgh-a British lal inah lak a ni dawn a, D-Day+3 ah St Giles Cathedral-ah chhungkaw bil tan inkhawm buatsaih a ni ang. D-Day+4 ah rel hmangin a ruang hi London-ah phurh a ni dawn a, Buckingham Palace-ah lak phawt niin, heta ṭang hian Westminster Hall-ah lak a ni leh ang. He hmunah hian ni 3-5 chhung, mipuiten an lal zahna hlan leh thlahna hun an hman theihna atan a ruang hi dah a ni ang.

D-Day+10, September 18-ah Britain lalnu ruang hi Westminster Abbey-ah state chawimawina nen vui a ni ang. A vuina inkhawmah hian ram hrang hrang hruaitute an tel rin a ni. Vuina hunserh hman ṭan hma darkar khatah, Britain ram pumah lalnu sunna atan ngawi rengin minute 2 an ding dawn a ni.

Hunserh hman zawhah, lalnu kuang hi Wellington Arch thleng kawng zawhpui a ni ang a, heta ṭang hian Windsor panpui a ni ang. A ruang hi Windsor Castle-a St George's Chapel-ah phum a ni ang.

Britain lal thar King Charles III
Queen Elizabeth II thih hnuah, a fapa upa ber Prince Charles chu Britain lal atan ruat nghal a ni a, King Charles III tih a ni. A nupui, Duchess of Cornwall Camilla chu Queen Consort tih a ni ang.

Charles hi official-in vawiinah London-a St James Palace-ah Accession Council hmaah lal thar atan puan a ni ang. Kum 74 mi ni tawhin, British lal atana puan zinga upa ber a ni. Vawiina hun hman turah hian dan ang chuan mi 700 chuang tel theih a ni a, mahse a hun chawpchilh avangin tel erawh an tam thei dawn lo nia sawi a ni. Kum 1952-a lal atana Queen Elizabeth puan a nih khan, Acession Council-ah hian mi 200 vel an tel.

Lal atan puan a nih hnuah pawh, King Charles III hnena lallukhum khumtirna, coronation erawh chu neih mai a la ni rih lo ang. Kum 1952-a lal atana puan a nih hnuah, Queen Elizabeth II pawh kum 1953, June thlaah lallukhum khumtir a ni chauh a ni.

Coronation hi kum 900 chhung chu Westminster Abbey-ah neih a ni tawh. He hmuna Britain lal, lallukhum khumtir hmasa ber chu William the Conqueror niin, Charles hi 40-na tur a ni. Coronation bik hi sorkarin a senso zawng zawng tumin, sawm turte pawh a thlang ṭhin a ni.