Pakistan PM-in Trump-a chhang let dawn

Pakistan Prime Minister Shahid Khaqan Abbasi chuan nimin khan an ram sipai hotute hmuin, US President Donald Trump-a’n Afghanistan tana US policy thar a sawichhuah rual a, Pakistan ram a sawiselna chungchang chhan let dan an rel.

President Donald Trump hian Pakistan chu a ram chhunga firfiakte nuamsa leh zalen taka awmtirah a puh. US-in Pakistan sorkar leh sipaite chhawmdawlna tura kumtina sum tak tam a pek laiin, Pakistan chuan US-in a do ber firfiakte a humhim niin a puh a, hei hi US chuan a ngaizam mai mai tawh dawn lo tihte a sawi a ni.

Trump-a thusawi chungchang hi Pakistan PM chuan a la chhang let lo a, mahse Foreign Minister Khawaja Asif chuan America chuan Afghanistan-a firfiakte a do letna a hlawhchhamnaah Pakistan chu inthup leh inphatmawina remchanga a hmang tur a ni lo tiin, Pakistan chuan firfiakte a hum ngai lo tih a sawi.

Pakistan sipai hotu, General Qamar Javed Bajwa pawhin an rama US ambassador David Hale chu a lo hmu tawh bawk a, Pakistan chuan US ṭanpuina sum aiin inrintawnna leh inhriatthiamna a duh zawk tih a hrilh.

Pakistan official-te chuan firfiak pawl hrang hrang - al-Qaida, ISIS leh Pakistan Taliban leh pawl dangte an beihletna kawnga Paksitan inpekna chu US chuan a hriatpui duh loin a zahsak lo niin an sawi. Kum 2001, September 11-a firfiakten US an beih hnua firfiakte laka beihpui thlakna kalpui chu zawmin, firfiakten an beihna avangin mi 70,000 chuangin nunna an chan tawh tih an sawi.

President Trump-a’n Afghanistan dinthar lehna tura hmalaknaah Pakistan hmelma ram, India chu nasa zawka inrawlh tura a duh thu a sawi chuan Pakistan official-te a tilungawi lo hle bawk a, Afghanistan chungchanga India inrawlh thuk tir an nih chuan Afghanistan leh a chhehvel bial himna a tiderthawng thei niin an sawi.