Typhoon Hato tleh vangin mi 12 an thi

China chhim lam leh Hong Kong-ah thlipui, Typhoon Hato tleh avangin mi 12 an thi a, mi 153-in hliam an tuar. Thli tleh hian thil tam tak a tichhe bawk.

China chhim lam, Macau-ah chuan thli tleh avang hian mi pariat an thi a, in eng emawt zat chhiain power supply a chhe bawk. Macau lawmaker Jose Pereira Coutinho chuan in tam tak thawm ṭhat ngaia a awm thu a sawi a, nimin tlai lam thleng khan tui leh electricity supply an la nei lo.

Cautinho chuan, thle tleh hian ruahtui a pai tel avangin ruah a sur nasa hle a, kawtthlerte chu tuiin a chim nasa hle a, harsatna tawkte ṭanpuina tura lawng a awm mai lo tih a sawi. Chhiatna an tawh chungchanga hma a lak dan­ah city government chu che muang lutuk nia sawiin a sawisel a ni.

Guandong province-ah thlipui tleh avang hian mi pali an thi bawk. Ruahsur nasa leh tuifawn sang takin thlai chinna ram zau tak a chim chhia nia sawi a ni a, harsatna tawk mi 27,000 te chu emergency shelter-ah sawn an ni. Tuipuia sangha mantu lawng chhuakte pawh ko kir vek an ni a, rel service leh flight pawh cancel a ni bawk.