Myanmar aṭangin Rohingya tlanchhia

Myanmar-Rakhine state-a tharum thawhna thleng avang­in Rohingya muslim sang tel chu Bangladesh ramah an tlanchhe tawh.

Bangldesh Cox’s Bazar-a raltlante awmna tur camp siamah Rohingya refugee hi nuai li dawn an awm tawh nia sawi a ni.

Rakhine state-a Rohingya muslim-te laka tharum thawhna thleng fo avangin an zinga tam tak chuan Bangladesh hi an pan a, Bangladesh rama an awmna refugee camp pawh a tawt tawh hle a ni. Bangladesh border leh coast guard-te chuan dan loa lutte ven hna hi thawk mah se lut an awm belh reng a, hetih lai hian Bangladesh-a luh tum Rohingya 31-te chuanna lawng chu kir tir a ni.

Refugee camp-a awm mek­te chuan ni 11 kalta chhung khan raltlan hi mi 700 vel an thlen belh niin an sawi. Camp chhungah riahna te an chan kim tawh loh avangin tam tak chu camp pawn lamah an riak tawh a ni.

Nikum October thlaa Rakhine state-a police post beih a nih avang khan security force-te chuan Rohingya muslim-te lakah beihpui an thlak a ni. UN chuan Rohingya-te hian security force-te lak aṭang­in pawngsual, nghaisak leh thahte an tawk niin a report a, mahse UN report hi Myanmar sorkar chuan a pawmsak lo. Nikum October thlaa sipaiten beihpui an thlaknaah khan Rohingya 400 vel tihhlum an ni.