Yemen khawpuiah beihpui thlak

Saudi Arabia kaihhruai Arab ṭangrual ram chuan Yemen khawpui, Sanaa-ah sorkar laka hel, Houthi-te lakah beihpui an thlak leh.

Arab ṭangrual ramte hian Sanaa-a Houthi enkawl, checkpoint bula hotel chu an bei a, mi 48 thiin midang 26 velin hliam an tuar. Thi zinga a tam ber hi sumdawng an ni.

Houthi helpawl hian Yemen President Abed Rabbo Mansour Hadi-a kaihhruai sorkar an paihthla a, Sanaa khawpui hi an awp zui a ni. Houthi helte hi Iran leh Yemen president hlui Ali Abdullah Saleh-a lamṭangten an thlawp a, kum 2015 aṭang khan Sanaa bakah an ramchhung hmun tam tak chu an thuhnuaiah an dah a ni.

Kum 2015 March thla aṭang khan Saudi kaihhruai Arab ṭangrual ramte hian President Hadi-a thlawpin, Houthi hel lakah hian beihpui an thlak ṭan a ni. Kum 2015-a tualchhung indona a thlen aṭangin mi 10,000 chuangin nunna an chan tawh a ni. Kumin chhung pawhin Yemen hi thlawhtheihna hmangin ṭum 5,000 chuang kah a ni tawh niin, Global Protection Cluster chuan a tarlang bawk.