September 19-ah Queen Elizabeth II vui a ni dawn

Britain lal ni rei thei ber, September 8-a kum 96 mi nia thi, Queen Elizabeth II vui dan tur ruahmanna chu tihchhuah a ni a, September 19 hian London-a Westminster Abbey-ah chawimawina nen vui liam a ni dawn ta.

Operation London Bridge code hmingin Queen Elizabeth II ruang hi Scotland aṭanga London-a lak a nih dan leh, a vui dan turte hi ruahman a ni.

Inrinni, September 10
King Charles III chuan St James’s Palace-ah Accession Council hmaah Britain lal thar atan official-a puan a ni. Hemi hnu hian lal-in balcony aṭangin lal atana puan a nihna lehkha hi chhiar chhuah a ni a, UK hmun hrang hrangah chhiar chhuah a ni ve bawk. Britain prime minister thar Liz Truss leh senior lawmaker-te chuan Parliament-ah lalnu sunna hun an hman zawh hnuah lalber thar hmaah hian rinawmna thu an tiam zui a ni

Prince of Wales,William leh a nupui Princess of Wales, Kate leh Prince Harry leh a nupui Meghan, duchess of Sussex -te chuan an ram mipuiten Queen Elizabeth II thlahna atan pangpar an dahte an thlir ho.

Scotland-a Balmoral Castle bulah, lalnu fate zinga a naupang pathum Princess Anne, Prince Andrew leh Prince Edward bakah a chhungte chuan lalnu uina thuziak ṭleh pangpar dahte chu an thlir ho bawk.

Pathianni, September 11
Queen ruang an zalhna, oak hmanga siam kuang chu Balmoral Castle aṭangin Edinburg-ah lak a ni a, kawng lakah khaw hrang hrang an kaltlangte chuan an lalnu zahna hi a lo hlan a ni. Scotland khawpuia Palace of Holyroodhouse-ah a kuang hi zan riahpui a ni.

London-ah King Charles III chuan lal a nihna ram, Commonwealth ram 14 aṭanga palaite nen inkawmhona hun a buatsaih. .

Thawhṭanni, September 12
Lalnu kuang hi Edinburgh-a St Giles’ Cathedral-ah lain, he hmunah hian mipuite tlawh theih turin darkar 24 dah a ni ang.

King Charles II leh Camilla, queen consort-te chuan Parliament-a House of Commons leh House of Lords-ah lalnu sunna hun an hmanpui dawn a ni. Hemi hnu hian lalber nupa te hi Edinburgh panin an thlawk nghal ang.

Thawhlehni, September 13
Lalnu ruang hi kuang phurtu, hearse hmangin Edinburgh Airport-ah panpui a ni dawn a, heta ṭang hian Royal Air Force hmangin London-ah thlawhpui a ni ang. Buckingham Palace panpui nghal ani ang.

Lalber leh Camilla chuan Northern Ireland tlawhin, St Anne Cathedral-ah lalnu hriatrengna hun an hmanpui dawn a ni.

Nilaini, September 14
Buckingham Palace aṭangin Parliament-ah gun carriage hmangin lalnu kuang hi phurh phei a ni dawn a ni, lal chhungkuaten an zui ang. Parliament-a medieval Westminster Hall-ah dahin, archbishop of Canterbury chuan hunserh tawi a hmang ang. He hmunah hian lalnu kuang hi ni li chhung, a vui hma zing thleng a awm zui tawh dawn a ni. Mipuite chu an lalnu thlah turin an tlawh phalsak an ni dawn a, hemi chhung hian sipaite chuan a ruang hi an vil reng dawn bawk a ni.

Zirtawpni, September 16
Lalber leh queen consort-in Wales an tlawh ang.

Thawhṭanni, September 19
Lalnu kuang hi Westminster Hall aṭangin Westminster Abbey-ah zing dar 11 aṭangin vuina hun pui ber, state funeral nei turin hruai a ni ang. Khawvel ram hrang hranga hruaitute leh hotute pawh he hun hmanpui tura beisei a ni. Hei hi ram chhunga ni 10 an sunna ni chiah a ni a, UK pum huapah chawlh puan a ni.