Afghan hmeichhiate'n school khar vangin lungawi lohna lantir

Afghanistan-a Paktia province-ah zirna in an ṭan tukah Taliban sorkarin school a kharsak leh nghal avangin zirlai hmeichhia tam tak chuan lungawi lohna an lantir.

Taiban-ten thuneihna an chan hnuah, Afghanistan-ah hian kum khat chuang chhung chu hmeichhia, secondary school zirlai maktaduai thum vel chu lehkha zir chhunzawm thei loin an awm tawh a ni.

Taliban hian hmeichhiate tana zirna pek leh hnathawh an phalsak dawn tih sawi mah se, sorkarna an chan hnuah hmeichhiate khuahkhirhna thar an kengkawh nghal. Kum 1996-2001 inkara hmeichhiate khuahkhirhna khauh tak a lo siam tawh ang khan a kalpui leh nghal a ni.

Tun thla tir khan Paktia province khawpui, Gardez-ah chuan tribal hotute leh school principal-te rawt angin hmeichhe school palite chu hawn a ni a, mahse Taliban sorkara Minsitry of Education aṭang erawh phalna an hmu lo thung. Inrinni-a Gazdez-a zirlai hmeichhiate school kal leh an tum chu school-a luh phal loin in lama haw tura tih an ni. Hei vang hian women rights activist leh tualchhung mite chuan lungawi lohna hi an lantir tih an sawi.

Hetih lai hian official lam chuan harsatna dang vanga school kal khap an ni tih sawiin, Islamic dan mila an kalpui theih veleh class pawh an kal chhunzawm theih tur thu an sawi.