Thai PM hlui manna tur thupek tichhuak

Thailand Prime Minister hlui, Ying­luck Shinawatra-i chu nimin khan a thubuai ngaihtuah tura court-ah a inlan loh avangin Supreme Court chuan manna tur thupek a tichhuak.

Nimin khan Yingluck-i hi court-ah inlan tur a ni a, amah thlawptu mi sang tel pawh court bulah hian an pungkhawm a ni. Mahse lead judge Cheep Chulamon chuan Yingluck-i ukil hi a damlo a, hei vang hian a thubuai ngaihtuah hun pawh tikhawtlai turin a ngen niin a sawi. Court chuan Yingluck-i a damlo nia sawi hi a awih lo a, hei vang hian manna tur thupek hi a tichhuak ta a ni, a ti. Yingluck-i thubuai hi September 27-ah ngaihtuah tura tih a ni leh ta a ni.

Yingluck-i kaihhruai sorkar hi kum 2014 khan sipai chakna hmanga paihthlak a ni. Prime Minister a nih laiin Yingluck-i hian rice subsidy policy a kalpui a, he policy vang hian sorkar chuan sum tam tak a hloh nia sawiin thubuai siamsak a ni. A thubuaiah hian thiam loh chantir a nih chuan kum 10 lung-in tan bakah, a damchhunga politics khel zui thei lo tura hrem theih a ni ang. Yingluck-i hi Thailand ram chhungah a la awm em tih pawh hriatchian a ni lo.

Rice subsidy policy hmang hian Ying­luck-i kaihhruai sorkar chuan thingtlang lama Yingluck-i thlawptute tamna biala loneitute hnen aṭangin market rate aia a leta sangin buhfai a laksak ṭhin a, hei vang hian sorkar chuan sum tam tam tak a hloh a ni. Mahse Yingluck-i chuan he thila mawhphurtua an puhnaah hian thiam lohna a nei lo tih a sawi a, politics lama an beihna zawk niin a sawi.

Yingluck-i nuṭa, prime minister hlui Thaksin Shinwatra pawh eiruk thubuaiah thiam loh chantir niin kum hnih jail tang tura hrem a ni a, mahse court-in hremna a tihchhuah hma lawkin, kum 2008 khan Thailand aṭangin a tlanchhia a ni. Tun thlengin Thailand-ah hian a kir tawh lo a, a passport pawh hlihsak a ni tawh. Mahse Montenegrin passport hmangin Dubai, London, Hong Kong leh Singapore-ahte a awm kual a ni.