Venezuela-in Colombia TV channel pahnih titawp

Venezuela communication regulator Conatel chuan an rama Colombia television channel tihchhuah pahnih chu a tihtawpsak.

TV channel tihtawpte hi Caracol leh RCN an ni a, Ningani zan aṭang khan tihtawp an ni a, hemi hma hian CNN Spanisch channel pawh Venezuela-ah tihchhuah khap a lo ni tawh bawk.

Venezuela sorkar chuan TV channel pahnih tihtawp a nih chhan hi a sawilo a, mahse hemi hma hian President Nicolas Maduro chuan Colombia sorkar leh an hruaitute chu a kaihhruai sorkar tihchhiat tuma phiarruah a lo puh tawh a ni.

Caracol director chuan an channel tihtawp chungchangah Conatel hian engmah hrilhfiahna an pek loh thu a sawi a, mahse Venezuela sorkarin manna thupek a tihchhuah, chief prosecutor hlui Luisa Ortega-i’n Colombia a thleng lai an cover vanga tihtawpsak an nih a rin thu a sawi.

Venezuela President Maduro hian international media organization-te chu a lo sawisel fo tawh a, press conference a neinaah pawh BBC chu an ram tualchhunga buaina-a sipai inrawlh chungchangah pawh a mawhphurtu zingah a puh a, CNN, Fox News leh BBC-te chu an ram chanchin dik tawk lo thehdarh ṭhinah a puh bawk.