NKorea-in missile pathum kap chhuak leh

North Korea chuan kar kalta Inrinni khan short-range missile pathum a kap chhuak leh.

South Korea chuan NKorea-in missile a kahchhuah thu hi a puang a, NKorea-a Gangwon province aṭanga kah chhuah a nih thu leh, pahnih chu an ram hmar­chhak lam hawiin km 155 vel an thlawk a, a pathumna erawh chu kah chhuah a nih hnu lawkah a puak tih a sawi. Inrinni-a missile kahchhuahte hi Pacifici tuifinriat-a US territory, Guam thliarkar tan a hlauhawm pha lo niin US chuan a sawi.

Missile pathumte hi NKorea huna Inrinni zing dar 6:49 leh 7:19 inkara kah chhuah an ni tih, South Korea Defence Ministry chuan a sawi. US Navy Commander Dave Benham chuan NKorea missile kah chhuah chanchin hi chiang zawka hriat tumin an bei mek tih a sawi.

Inrinni-a NKorea-in missile a kah chhuah hi kumina vawi 13 a kah chhuahna a ni. United Nations Security Council resolution chuan North hi nuclear weapon program kalpui lo turin a lo khap tawh a, mahse NKorea hian UN resolution hi vawi tam tak a palzut tawh a ni. July thla khan khawmualpui dang kap pha tur, intercontinental ballistic missile pahnih chu hlawhtling takin a lo enchhin tawh bawk.

North Korea ram hotu lu ber, Kim Jong-un chuan kar kalta Nilaini khan an rama ralthuam lam zirna leh siamna hmun, Academy of Defence Science a tlawh a, rocket engine leh missile tam zawk siam turin a lo hrilh tawh bawk a ni.