DR Congo tualchhung buaina avangin mi mtd 3.8 tlanchhia
DR Congo tualchhung buaina avangin thla ruk chhungin mi maktaduai 3.8 an tlanchhe hman niin, UN Official chuan a tarlang.
UN refugee agency official George Okoth-Obbo chuan tualchhung buaina chhuakah hian mi 3,000 chuang an thi tawh niin a sawi a, buaina hluarna hmun Kasai bialah chuan mi maktaduai 1.4 ten an in leh lo an tlanchhiatsan a, heng mite hi ei tur leh thuanhnaw te pek an ngai tih a sawi.
George hian ni thum tlawhin Congo ram hi a tlawh a, harsatna tawk mekte dinhmun thlithlaiin, ṭanpui thuai an mamawh hle tih a sawi. An dinhmun chu a ṭha lo hle tih a sawi bawk.
Kasai bialah hian nikum September thlaa tribal lal, Kamwina Nsapu thah a nih hnuah buaina hi a chhuak a ni. Nsapu hi Congo President Joseph Kabila kaihhruai sorkar leh a aiawhte dodaltu a ni a, thah a nih hnuah amah thlawptuten buaina an siam chho ta a ni. Mihring dikna chanvo palzut te, pawngsual leh nghaisak bakah, sipai atana naupangte hman luihte pawh a hluar hle. UN chuan Congo tualchhung buaina avanga tlanchhia tam zawk hi Angola-ah an kal niin a sawi a, hetihlai hian Congo ramah hian Burundi, Rwanda, South Sudan leh Central African Repubic aṭangin raltlan nuai nga vel zet an lut bawk.