Yingluck-i Dubai-ah a tlanchhia

Thailand Prime Minister hlui, Yingluck Shinawatra-i chu rice subsidy scheme chung­changa court-in hremna pek tur a puan hmain ram pawn lamah a tlanchhia a, Dubai-ah a kal nia hriat a ni.

Yingluck-i thubuai chung­changa court thutluk hi kar kalta Zirtawpni-a puan turatih kha a ni a, mahse a thubuai ngaihtuah ni hian a damloh chhuanlamin court-ah a inlan lo a, hei vang hian manna tur thupek pawh tihchhuah a nih phah bawk. Zirtawpni vek khan Yingluck-i hian Thailand a chhuahsan tih a sawi a ni a, mahse khawi ram nge a pan tih erawh sawichian a ni lo.

Shinawatra-i party, Phei Thai Party senior member chuan Yingluck-i hian Cambodia a pan a, heta ṭang hian Singapore-ah kal lehin, Singapore aṭangin Dubai-ah a kal niin a sawi. Yingluck-i u, prime minister hlui Thaksin Shinawatra pawh Dubai-ah hian a awm mek a ni.

Thaksin-a hi kum 2008-a eiruk thubuaia thiam loh chantir a nih khan man a nih hmain Dubai-ah hian a tlanchhia a ni.

Yingluck-i prime minister a nih lai hian a kaihhruai sorkar chuan rice subsidy scheme a siam a, he scheme hnuaiah hian amah thlawptu loneitute buhfai chu man to tak takin sorkarin a laksak ṭhin. Hei vang hian sorkar chuan sum tam tak a hloh phah a, a mawhphurtuah Yingluck-i hi puh a ni. He thubuaiah hian thiam loh chantir a nih chuan kum 10 thleng lung-in tantir bakah, a dam chhunga politics khelh khapsak a ni thei dawn a ni.

Kum 2001-a Prime Minister atana thlan tlin a nih hnu khan Yingluck-i hian rice subsidy scheme hi a kalpui nghal a, kum 2014 January thla khan he scheme vanga sorkarin sum tam tak a hloh chungchangah Yingluck-i chu anti-corruption branch-in a chhui a ni. Kum 2014 May thla khan a thuneihna hmang dik loa puhna thubuai dangah thiam loh chantir a nih avangin PM a nihna aṭanga ban luih tir a ni a, a hnu lawkah a kaihhruai sorkar chu sipai chakna hmanga paihthlak a ni zui bawk.

Kum 2015 khan rice subsidy scheme chungchangah Yingluck-i hi thubuai siamsak a ni a, court phalna nei lo chuan an ram chhuahsan khapsak a ni bawk.