Ukraine khawchhak lamin power supply nei lo ; Ukraine President-in Russia a puh

Ukraine sipaite'n Kharkiv region-a Russian army-te bei let a, an tawlhkir tir hnuah Ukraine khawchhak lam bialah power supply a tawp. Ukraine president Volodymyr Zelenskyy chuan he thilah hian Russia chu mawhphurtuah puhin, tum reng vanga civilian infrastructure beiah a puh bawk.

Ukraine official-te chuan an rama khawpui lian pahnihna, Kharkiv-a water facility leh thermal power station chu beih a nih vangin power supply a pechhuak thei lo a, tui pekchhuah pawh titawp a ni tih an sawi.

Pathianni zan khan president Zelenskyy chuan a twitter-ah Russia sipaite chu 'firfiakte' tia sawiin, sipai hmun pawh ni lo, mipuiten eng leh lum an hmuh theih lohna tura thiltih chu an tum reng a ni, a ti. Russia sipaite thiltih hian he region-a cheng, mi maktaduai kua vel a nghawng thei dawn a ni.

Kharkiv region governor Oleg Synegubov chuan, "Chenna hmun tam takah kawlphetha emaw tui supply emaw a awm lo. Emergency service-te chu site-a kangmei chhuak ṭhelh tumin an thawk mek a ni," a ti. Pathianni vek khan Sumy, Dnipropetrovsk, Poltava, Zaporizhzhia leh Odesa region-ahte power supply hi a tawp bawk. Mahse Sumy, Dnipropetrovsk leh Poltava-ah chuan rei vak lo hnuah a rawn ṭha leh tih official-te chuan an sawi.

Ukraine foreign ministry thupuangtu Oleg Nikolenko chuan Russia sipaite thiltih chu khawchhak lamah an hnungtawlh tawh avang leh, an ram lak tawh sa eng emaw zat lakkir sak an nih avanga an beidawn che vel niin a sawi. Pathianni khan Russia hian Ukraine rama hmun 15 vel a bei leh a ni.