Sierra Leone leimina thi zat 1,000 an chuang

Sierra Leone khawpui, Freetown-a ruahsur nasa avanga leimina thi zat chu mi 1,000 an chuang tawh.

Sorkar chuan August 14-a leimin nasa tak avanga thi zinga 450-te ruang chu hmuh tawh a nih thu a sawi a, hetih lai hian chhanchhuah hna thawktute chuan leimin avanga chin hriat loha awm mi 6,000 chuang chu an dam khawchhuah a rinawm tawh lo tih an sawi.

Leiminna hmun, Freetown khawdaia Regent bial hruaitu, Elenoroh Jokomie Metzger chuan leimin leh tuilian avanga chhiatna thlengah hian mi 1,000 chuang an thi a, a zat dik tak hi an la hre thei lo niin a sawi.

Leiminin a chhilh, ruang an lakchhuahte chu a ruala phum an ni tawh a, hetihlai hian ruah a sur chhunzawm reng avangin chin hriat loha awmte zawn hna pawh thawh chak theih a ni lo a, in tam tak pawh an dinhmun a him lo hle nia sawi a ni. Din­hmun hlauhthawnawm nia hriatte chu hmun him lamah sawnchhuah an ni. Harsatna tawkte chhawmdawl hna hi thawh chhunzawm reng a ni bawk.

Sawiseltu ṭhenkhat chuan Sierre Leone sorkar chu chhiatna an tawh fo tawh aṭanga inzirna chang hre loah an puh a, khawpui chhungah tui paihna mumal siam a nih loh avang te, mi rethei tam zawk chenna chu sea level bul mai a nih avangin chhiatna hi a thleng fo niin an sawi. Hei bakah hian tlang pangah ruahmanna fel tawk awm loa in sak a nih ṭhin avangin chhiatna a thleng fo niin an sawi bawk.

Pathianni khan Regent bula Methodist church-ah leimin avanga thite sunna hun hi hman a ni. He hunah hian President Ernest bai Koroma nupui, Sia Koroma pawhin thu a sawi a ni.