Rohingya-te Myanmar-ah thawn kir

Myanmar-a Rakhine state-a buaina thleng avanga Bangladesh rama tlanchhia, Rohingya muslim eng emaw zat chu ramri an kan hnuah Myanmar lama thawn kir leh an ni.

Rakhine state-ah Myanamar sipaiten Rohingya muslim te awnma khua an beih avangin mi tam tak chu Bangladesh ramah hian an tlanchhe tawh a, hetih lai hian Border Guard Bangladesh (BGB) chuan dan loa an rama lut­te ven hna an thawk mek bawk. Pathianni khan dan loa Bangladesh rama lut, Rohingya 20-te chu Naf lui an kan hnuah man an ni a, Myanmar ramah thawn kir leh an ni. Inrinni khan police-te chuan border zone, ‘zero line’ an pelh hnuah Rohingya 70-te chu an thawn kir leh bawk.

Pathianni khan State Councsellor office chuan report tichhuakin, security force leh Rohingya helte inkara buaina chhuak avanga thi chu mi 96 an tling tawh niin a tarlang a, an zingah hian security mi leh sa 12 an tel. Hetih lai hian Rohingya te chuan thi zat hi hei ai hian an tam niin an sawi.